Incidente de Mukden

El incidente de Mukden (18 de setiembre de 1931), tamién conocíu como'l incidente de Manchuria o incidente del 18-9, tuvo llugar nel sur de Manchuria, cerca de Mukden (盛京; güei Shenyang), onde un tramu del ferrocarril del Sur de Manchuria, xestionáu por una compañía de propiedá xaponesa, foi dinamitado. Oficiales ultranacionalistes xaponeses volaron una seición mínima del ferrocarril xunto a la ciudá.^[1] El falsu ataque sirvió pa xustificar la ocupación de Manchuria pol Exércitu de Kwantung, lo que produció una seria crisis internacional.^[2]

Tanto la validez de los distintos alcuerdos ente les dos naciones como la so interpretación enfrentaba a los Gobiernos chinu y xaponés.^[3] Anque l'Estáu Mayor xaponés creía posible dirimir les diferencies por aciu la negociación con Zhang Xueliang, los mandos del Exércitu de Kwantung esixíen l'usu de la fuercia y la ocupación militar de Manchuria.^[4] Si l'altu mandu nun taba dispuestu a utilizar los choques llocales como xustificación pa la intervención militar, los mandos en Manchuria taben dispuestos a crear un incidente que lu desencadenara.^[4]

Mientres el branu de 1931, aumentó'l númberu de choques ente chinos y xaponeses en Manchuria.^[4] A finales del branu, les rellaciones billaterales ente China y Xapón empioraren peligrosamente.^[5][6]

La voladura del tramu de vía la nueche del 18 de setiembre de 1931, supuestamente realizada por soldaos chinos,^[7] y los consiguientes choques ente tropes chines y xaponeses qu'empezaron esa nueche de setiembre llevaron a la ocupación de Mukden a otru día.^[8] Alegando llexítima defensa, unidaes del Exércitu de Kwantung xaponés empezaron darréu a ocupar diverses llocalidaes a lo llargo de la llinia ferrial y llueu s'estendieron por toa Manchuria.^[7]

1. ↑ Yoshihashi, 1963, p. VII.
2. ↑ Yoshihashi, 1963, p. VIII.
3. ↑ Yoshihashi, 1963, p. 128.
4. ↑ ^{4,0 4,1 4,2} Ogata, 1964, p. 49.
5. ↑ Ferrell, 1955, p. 67.
6. ↑ Ogata, 1964, p. 57.
7. ↑ ^{7,0 7,1} Ferrell, 1955, p. 66.
8. ↑ Ogata, 1964, p. 59.